انترنت 1: ممكن تعملى ايمايل لو سمحت....الله يخليك

ممكن تعملى ايمايل لو سمحت....الله يخليك
لن انسى هذا اليوم كان فى حوالى 1999 فى الصيف اللى قبل اولى ثانوى كنت لسه عارف ناس جديدة عن طريق اصحاب اعدادى وكنا نستقل الترام بعد اكلة فول وفلافل متينة من ابو ربيع على المحطة العتيقة وكان على رأس الناس دى هيثم..الذى ابهرنا فى يوم عندما اخبرنا انه يمتلك ثلاث ايميلات ...وااااااو مين الجامد ده؟؟؟ والنبى يا كابتن عملتهوم ازاى هاه هاه؟؟؟ رد بمنتهى الثقة مينفعش فى الترام دى حكاية معقدة...احب هو ان يستأثر بالسر العلمى العالمى التكنولوجى الخطير و لم يكتفى بذلك بل أخرج من محفظته العتيقة كارت لمحاسب وعلى خلفيته كتب بحروف من ثقة وتفوق عناوينه الألكترونية المتناثرة ياهوو,هوتميل,مكتوب ..يابن الذينا بتعملهم ازاى؟؟؟
وطبعا كحائز المعدن الجديد لم يفشى هيثم السر..وظللت احلم بامتلاك ولو ايمايل واحد وكيف اقتحم ذلك العالم العنكبوتى المرعب ..الأنترنت
بعد ذلك بعدة اسابيع عرض على صديق الطفولة بورجو كما نطلق عليه احيانا نسبة الى البورجوازيه..المهم عرض على الذهاب فى نزهة الى انترنت كافيه وكانت تكلفة تمضية بضع ساعات فى هذا المكان اغلى من كلفة دخول السينما..الساعة كانت بحوالى عشرة جنية وكده كانت رخصت وكانت شىء نادر..روحنا وانا طبعا ابيض يا ورد وكان بورجو متحمس جدا وقالى :حوريك النهاردة بلاوى حاجة فوق الوصف...وطبعا انا ساعتها كنت فى منتهى الأثارة شىء يضاهى دخولك ديزنى لاند لأول مرة
وبدأ بورجو فى أخذ يدى لهذا العالم السحرى ....دخلنا على محرك بحث هوتميل حيث لم يكن فى وقتها محركات بحث افضل ومتطورة ومتنوعة مثل الآن وبمنتهى الإنبهار وبعين مليئة بالجرأة...قالى: بص بقى حنكتب مرسيدس وتضغط بالماوس هنا كده حيجيبلك صور وموديلات مرسيدس وحاجات كتير وطبعا انا بانكار وعدم تصديق رديت قولتله مش قوى كده انت حتشتغلنى ولا ايه؟؟ وطبعا وقت تحميل الصفحة كان كافى اننا نختلف ونقنع ونتعارك وكله...وبالفعل فتحت الصفحة ووجدت كلامه صحيح صور اخبار معلومات كل شىء موجود ونظر لى نظرة الواثق شوفت....وانا طبعا مذبهل طبعا يمكن حد يفتكر انها سذاجة بس للفت النظر كان عندى 13 سنة وما ادراك بالأنترنت فى التسعينات...طبعا طلبت منه انه يعملى ايمايل وقعدت ادرس بدقة وانتباه كيفية الدخول الى الأيميل بعد فشلى فى تتبع كيفية عمله لأنه برضه استخدم معايا بعض التمويه ...زيه زى هيثم
وأخيرا اصبح عندى ايمايل...قريبا ححكيلكم عن استخدامنا العبقرى العصرى للأنترنت المصرى بعد ما بقينا جامدين وعندنا ايميلات
.....بـــخ