هل حسيت فى يوم بالأحساس ده؟؟؟؟انك سعيد بشكل فوق الوصف....طب وبعدين؟؟ انك ممكن تعمل اى حاجة وفى اى وقت حتى لو كنت مبتحبهاش فى الأوقات التانية وبتمثلك عبء....طيب كمل!! انك ممكن تبقى خدوم لصحابك واهلك بشكل مطلق ومعندكش مانع تعمل اى حاجة مع انك فى الطبيعى بتطلع عين اى حد عشان تعمله خدمة وبتبقى كسلان لأبعد حدود...مممممم ايه تانى؟؟ انك تبقى ماشى فى الشارع سعيد ومنطلق وعايز تحضن كل الناس وتدور توزع بركات السلام والتحية والأبتسامة الورديه على كل اللى تشوفهم...تطلع سلم البيت جرى وتلاطف ولاد البواب مع انهم عيال غتته...واول ماتخش البيت بابا حبيبى ماما حبيبتى جدو حبيبى تيته حبيبتى اخويا حبيبى اختى حبيبتى وبلدى حبيبتى...احم احم بلاش بلدى دى ولا اقولك انت مهيص يعنى حتيجى على مصر الغلبانة خليك حبوب وحبها بالمرة.....حـــسيت بكل ده؟؟؟ إذن أهلا بك فى لحظات السعادة المطلقة المؤقتة؟؟؟؟؟
ايه دى بقى يا عم؟؟
دى لحظات بتشعر فيها بسعادة غامرة بتنسيك اى منغصات حياتية تانية وبتخليكى متصالح مع نفسك ومستعد تعمل اى حاجة ومتفهمش ايه كمية النشاط والتسامح اللى بتحس بيها فجأة...
طب ودى بتبقى امتى يابو الكباتن؟؟؟
اقولك,,بتبقى يوم ما تروح تجيب النتيجة وانت رايح مظبط نفسك حتشيل مواد وتلاقى انك جايب تقدير...
يا حلاوتها اه يعنى مفاجأة جميلة غير متوقعة؟؟؟
بالظبط كده...وتحسها برضه لما تسمع بحبك اول مرة من حد انت بتحبه دى بقى اوعدك بالطيران...
طب وامتى تانى؟؟؟
فى بقى لحظات مادية اكتر يعنى اخدت فلوس كتير...جبت حاجة كان نفسك فيها من زمان بس دى بيبقى تأثيرها اقل من الحاجات المعنوية..دايما راحة البال لا تشترى باموال...
طب ما ده شىء جميل ان الواحد يبقى متسامح ومتفائل ومتعاون ايه المشكلة؟؟
المشكلة ان وعد من أخ مخلص لن تستمر الحالة دى اكتر من 3 او 4 ساعات...او ممكن يوم لو انت انسان نقى حبتين او مُسبب السعادة فوق الوصف زى مثلا فى يوم وليلة تشتغل وتتجوز وتجيب عربية وشقة نضيفة وتكسب مليون جنيه والحاجات الحلوة الجميلة السهلة دى..
بس عارف مع انها لحظات قصيرة...بس بتجدد فينا وبتورينا ان احنا ممكن نعمل حاجات كتير لو عندنا سعادة ورضا داخلى وده بيهيألى اللى بينشده كل انسان
.....بـــخ
2 comments:
انت مسيت حاجة بتحصلنا بجد..بس بتبقى حلوة برضه
هههه
aywa ba7es besa3ada 3'amera bass mabad7'olsh betna le baba 7abebee we mama 7abebtee , batamalak nafsee la yeftekronee ba7eb gedeed :P or afteker enne Lebleba walla so3ad 7osnee.:PPP
Post a Comment