ايه ده ياااااااه!!!!!امشى ياد

Saturday, May 13, 2006
ده كان تاريخ اخر بوست ليا فى مدونتى العزيزة ذو العمر القصير جدا جدا جدا
فى بدايات صيف 2006 بدأت التدوين بتشجيع وتحفيز من صديقى العزيز جار القمر صاحب المدونة المشهورة والحائز على جائزة افضل مدونة عربية للعام 2006 بالرغم من اختلافنا فى حاجات كتير يمكن كان عايز طرف للمناوشة والأختلاف ..ما علينا وبدأت الكتابه بصراحة مكنتش عارف اكتب فى ايه انا من النوع اللى يعرف يتكلم اكتر من انه يكتب اصدقائى بيسمونى المكلمنجى يعنى بلاقى سلاسة فى خروج وترتيب الأفكار والتعبير عنها بصدق فى الكلام اكتر من الكتابه....
طب ايه اللى رجعك يا اموور؟؟؟؟؟ بصراحة كنت عايز اعلق فى مدونة جديدة جميله جدا اسمها انا ونفسى وبعدين خيرونى فى البوست انى استخدم حساب الجوجل البريدى ولا حساب البلوجر....ايه ده بلوج ايوه يابنى اولى اول يا حبيبى انت لسه عايش وافتكرت طبعا انى كنت رافع رايه تحت التطوير لمدة سنة وشهرين بصراحة تميز وتفوق ههههه
لقيت البلوج واحشنى ولحسن الحظ كنت شايل نسخة من البلوج هوبا يلا بينا انسخ الصق يافتى ثم بوست وان شاء الله ححاول اكون مكتباتى مش مكلمنجى بس حتى ولو فى الأستخوبوس كده من غير محد يقرا اللى انا بكتبه

أخيرا..........

بسم الله الرحمن الرحيم
فكرت كتير وترددت أكتر لكن أخيرا قررت ابدأ باللغة المصرية القديمة أبلج.............................................
أوله أول كانت أول احتكاك حقيقى ليا مع البشر مع الطفل اللى بيعيط عشان مامته مشت فى أول يوم دراسة واللى بيعيط عشان ميته خلصت من الزمزميه واللى بيعيط من ريحة الفصل اللى تقرف يا سلام لو كان ابن ناس وقعد جنبه عطوة ولا ابو شلوفه ودول للى ميعرفهومش عيال مخلصة سابقه سنها انا بخاف من العيال اللى زى كده لحد دلوقتى...
فحيخدوا شوكولاته وحاجته بنت الناس ,وطبعا بتبقى فرصة للمدرسين الشباب اللذاذ انهم يقرفوا العيال فى عشتهم :ايه يا قمور عايز ماما يا توتو نيهاهاهاهاههاها ونسى اول يوم ليه فى المدرسه زمان لما فرج امة لا إله إلا الله عليه
وشوية شوية حيبتدى الطفل يتعرف على سلطات جديدة للخوف منها وعلى رأسها الناظر او المدير حديثا والوكيل ورائد الفصل وطبعا طبعا مدرس الألعاب اللى معرفش ليه دايما بيخوف يمكن عشان بيلعب رياضة وصحته مساعداه فحيشوط فى العيال يمكن

ده غير البنات طبعا يتلموا على أبله تبقى هى الأم الروحية ليهم وفى عيد الأم يا تيكا أنص هدايا وورد ويا سلام وطبعا لازم يحسسوا الولاد انهم أقل منهم وان الولاد كائنات متوحشة ......
ونبتدى نخش فى المناهج الفساخونيا على التدريس البظرميت ويبتدى الطفل البرىء يعرف هو عايش فيين
بذمتك اللخبطة دى مبتفكركش بحاجة فكر كده يلا خير,,,, بص فى الشخبطة اللى تحت دى ممكن تفهم ولو مفهمتش دى
مسؤليتك انا مليش دعوة

مع الإعتذار للأستاذ سلفادور دالى